(కం.) 

ధాటిగ "వాట్సాప్ఫేస్బుక్"
బాటన జగతిని వడివడి వ్యాపించెడి యా
బూటక సుద్దుల వేగము
దాటుచు వ్యాపించుచున్న దౌర! "కరోనా"!!

ఇన్నాళ్ళూ వేగంగా వ్యాపించే శక్తి కేవలం వాట్సాప్ ఫేస్బుక్ లలోని ౠటకపు వార్తలకే అనుకున్నా. కానీ ఇప్పుడు కరోనా వాటికి మించిన వేగంతో వ్యాపిస్తోంది. ఎంత ఆశ్చర్యం!!

(కం.) 

ఎవ్వని భయమున వాయువు
రివ్వున వీచును, వెలుగుల ఱేడుదయించున్
ఎవ్వని భయమింద్రాగ్నుల
కెవ్వని భయమా"యమునికి" నీశ్వరు డతడే!

"భీషాస్మాత్" ఇత్యాదిగా తైత్తిరీయ ఉపనిషత్తు చెప్పిన మాటలివి.
ఎవరి శాసనానికి భయపడి(లోబడి) వాయువు వీస్తూ జగతిని పావనము చేయునో, ఎవరికి భయపడి (చీకటిని తరిమేస్తూ) సూర్యుడు(వెలుగులఱేడు) ఉదయించునో, ఎవరికి లోబడి ఇంద్రుడు, అగ్ని మొదలగు దేవతలందరూ తమ తమ విధులను నిర్వర్తిస్తారో, చివరికి అందరినీ భయపెట్టే మృత్యుదేవతయైన యముడుకూడా ఎవరికి భయపడి తన పనులను చేస్తాడో వాడే ఈశ్వరుడు, నారాయణుడు. వాడే బ్రహ్మమని పిలవబడు వస్తువు.

అభయములిచ్చెడి సింహము,
నభమును దాటు ప్రభ లీను నైజపు సింహం,
ఇభ సదృశ దైత్య సింహము,
స్వభీష్టదశ్రీనృసింహ! వసుధను, నీవే!

స్తంభము బగులగ వెలువడి
గంభీర రవముల తోడ గనకకశిపు హృత్
కుంభోదరముల జీల్చిన
డింభకరక్షక నృహరిని డెందము నిడెదన్

[డెందము=హృదయము, డింభకుడు=పిల్లవాడు, (ప్రహ్లాదుడు), కనకకశిపుడు=హిరణ్యకశిపుడు]

ఈ భూమిమీద ఎన్నో వనసింహాలను, గ్రామసింహాలనూ చూస్తూ ఉంటాం. కానీ అవేవీ అభయాలనూ, అభీష్టాలనూ ఇవ్వవు. మదపుటేనుగుల్లా బలిసిన మన అంతఃశత్రువులనూ బాహ్యశత్రువులనూ చంపే సింహాలు కావవి. ఆకాశమంతా వ్యాపించే ప్రభ ఆ సింహాలకు లేదు. కానీ ఈ అన్ని గుణాలనూ కలిగిన ఒకే ఒక అరుదైన లక్ష్మీసమేతమైన నరసింహము నీవేనయ్యా!

"ర్ఫ్యూ" ప్రాసతో ఒక మిత్రుల ప్రశ్నకు నా ప్రయత్నం!

(కం.)
"కర్ఫ్యూ" గల యీ రోజున
"పర్ఫ్యూమ్" కొరకనుచు నీవు బయటే తిరగన్
"సర్ఫ్యూస్" చేసి యుతుకుదురు
"పర్ఫ్యూమ్" కొనవచ్చు పిదప, ప్రాణము ముఖ్యం!

(సర్ఫ్యూస్ చేసి = "Surf" use చేసి)
ఇది కేవలం సరదా కోసమే! నేటి జనతాకర్ఫ్యూ తో దీనికి సంబంధం లేదు. గమనించండి.

(కం.) 

కమలపు నీ పాదములకు
భ్రమరము నయ్యెద సుగుణ పరాగము గ్రోలన్
భ్రమరము నీవవఁగను హృ-
త్కమలము నర్పించెద హరి! కైంకర్యముకై

ఓ శ్రీహరీ! నీ పాదములు కమలములైతే నేను ఆ కమలములలోని అమృతప్రదములైన నీ సద్గుణాలు అనే పుప్పొడిని గ్రహించే తుమ్మెదనౌతాను. లేక నీవే తుమ్మెదవైతే నా హృదయకమలమనే పుష్పాన్నే నీ సేవకోసం అర్పిస్తాను.

(కం.) 

"కోరోన"ను బ్రహ్మాస్త్రఁపు
వీరంగము తాళలేము పిచ్చుకలమయా!
కారుణ్యామృత దృష్టిని
సారించిలఁ బ్రోవుమయ్య సద్గుణనిలయా!

అందరికీ శార్వరి యుగాది శుభాకాంక్షలతో,

సర్వేశ్వరునికి మ్రొక్కెద
గర్వము లేనట్టి జ్ఞాన గరిమలనొసగన్
శార్వరి సంవత్సరమున
సర్వులకారోగ్యమిచ్చి సంరక్షింపన్

శార్వరి యుగాది రోజున
నుర్విని గల బంధుమిత్రులురుతర పూజ్యుల్,
గుర్వాదులకందరికిన్
పర్వపు శుభకామనములు, వందన శతముల్

శార్వరి యుగాది వచ్చెను
సర్వులు గృహమున, "కరోన" సద్దణచ, మనన్
శార్వర-నిశ్శబ్దముగన్
సర్వము జరుపగ వలెనను సందేశముతో!

(శార్వర నిశ్శబ్దము - రాత్రిపూట ఉండే నిశ్శబ్దం)